स्वयंम पाटीलची कामगिरी नाशिकच्या शिरपेचात मानाचा तुरा खोवणारी !
स्वयंम पाटीलची कामगिरी नाशिकच्या शिरपेचात मानाचा तुरा खोवणारी !
नाशिक, दि. 27 जानेवारी :
नाशिक जिल्ह्यातील स्वयंम पाटील याने क्रिडा प्रकारातील स्विमिंगमध्ये उत्कृष्ट कामगिरी केली. या कामगिरीबद्दल प्रधानमंत्री नरेंद्र मोदी यांच्या हस्ते प्रधानमंत्री राष्ट्रीय बाल पुरस्कार २०२२ देवून स्वयंम पाटील यांस गौरविण्यात आले आहे. ही बाब नाशिकच्या शिरपेचात मानाचा तुरा खोवणारी असल्याचे सांगत अन्न, नागरी पुरवठा व ग्राहक संरक्षण मंत्री तथा नाशिक जिल्ह्याचे पालकमंत्री छगन भुजबळ यांनी स्वयंम पाटील व त्याच्या कुटुंबियांचे अभिनंदन केले.
यावेळी भुजबळ यांनी स्वयंम पाटील याने केलेल्या उल्लेखनीय कामगिरीचे कौतुक करत स्वयंम पाटील सारखे खेळाडू म्हणजे नाशिकचा अभिमान असल्याचे गौरवोद्गार काढले. स्वयंम पाटील या १४ वर्षीय बालकाने एलिफंट गुफा ते गेट वे ऑफ इंडिया हे १४ किलोमीटर खाडी ४ तास ९ मिनीटांत पोहून पार केल्याचा विक्रम स्वयंम पाटीलने केला आहे. याची दखल घेत केंद्र सरकारने त्यास क्रीडा क्षेत्रातील प्रधानमंत्री राष्ट्रीय बाल पुरस्कार २०२२ देवून सन्मानीत केले.
या वेळी जिल्हा क्रीडा अधिकारी पल्लवी धात्रक, क्रीडा अधिकारी संजीवनी जाधव, क्रीडा अधिकाई महेश पाटील , प्रकाश पवार, अविनाश टिळे व संदीप ढाकणे, माजी आमदार जयवंत जाधव उपस्थित होते.
