गडचिरोली पोलीसांच्या कारवाईत २६ नक्षलवादी ठार

मुंबई दि. 14 नोव्हेंबर :
गडचिरोली पोलीसांनी कारवाईत २६ नक्षलवाद्यांना ठार केले. या कारवाईत मोठ्या प्रमाणात शस्त्रसाठा जप्त करण्यात पोलिसांना यश आले. नक्षलवाद्यांविरोधात करण्यात आलेल्या या कारवाईत पोलिस दलाचे तीन जवान जखमी झाले आहेत. त्यांच्यावर उपचार सुरू असून त्यांची प्रकृती स्थिर आहे.

गडचिरोली जिल्ह्यातील ग्यारापत्तीच्या जंगलात माओवाद्यांच्या विरोधात पोलिसांनी केलेल्या कारवाईची गृहमंत्री दिलीप वळसे पाटील यांनी प्रशंसा करत,
“आमच्या पोलिसांचा मला अभिमान आहे,” अशा शब्दांत पोलिसांचे कौतुक केले.

ही कारवाई राज्याच्याच नव्हे तर देशाच्या इतिहासातील उल्लेखनीय कामगिरी ठरली आहे. राज्याच्या सुरक्षेच्या दृष्टीने कारवाई अत्यंत महत्त्वाची आहे. नक्षलवादाचा मुकाबला करण्यासाठी कार्यरत असलेल्या सी-६० दलाने मिळालेल्या माहितीआधारे पोलिस अधीक्षक अंकित गोयल यांच्या मार्गदर्शनाखाली अपर पोलीस अधीक्षक सोमय मुंडे आणि त्यांच्या टीमने ही कारवाई केली. या कामगिरीबद्दल महाराष्ट्र विशेषतः गडचिरोली पोलिसांचे गृहमंत्र्यांनी मनपूर्वक अभिनंदन केले आहे.