साठ वर्षात प्रथमच गृहमंत्र्यांची फॉरेन्सिक लॅबला भेट!

मुंबई, दि. २७ जून २०२०

पुणे येथील प्रादेशिक न्यायसहाय्यक वैज्ञानिक प्रयोगशाळेला (फॉरेन्सिक लॅबला) गेल्या साठ वर्षांत प्रथमच राज्याच्या गृहमंत्र्यांनी भेट दिली असून गुन्हे सिद्ध होण्याच्या संदर्भात या लॅबचे काम खूप महत्त्वपूर्ण व कौतुकास्पद असल्याचे गौरवोद्गार गृहमंत्री अनिल देशमुख यांनी भेटीदरम्यान काढले.

गृहमंत्री २६ जून रोजी पुण्यात काही कार्यक्रमासाठी आले असता त्यांनी या प्रयोगशाळेस भेट देऊन अधिकारी, कर्मचाऱ्यांसोबत चर्चा केली तसेच त्यांच्या कामाची पद्धत, अडीअडचणी याबद्दल माहिती घेतली.

यावेळी प्रादेशिक न्यायसहाय्यक वैज्ञानिक प्रयोगशाळा पुणेचे उपसंचालक राजेंद्र कोकरे, यांनी गृहमंत्र्यांचे स्वागत करून या प्रयोगशाळेत होत असलेल्या विविध कार्याविषयी सविस्तर माहिती दिली. यात प्रामुख्याने  संगणक गुन्हे,  ध्वनी व ध्वनीफीत विश्लेषण, जीवशास्त्र, डीएनए, विषशास्त्र, सामान्य विश्लेषण व उपकरणे आणि दारूबंदी व उत्पादन शुल्क विभागामध्ये करण्यात येणाऱ्या कामकाजाची सविस्तर माहिती देण्यात आली.

गृहमंत्र्यांचे सोबत झालेल्या चर्चेत सहाय्यक संचालक श्रीमती धर्मशिला सिन्हा, निलिमा बक्षी, सोनाली फुलमाळी, वैशाली शिंदे, अंजली बडदे, महेंद्र जावळे आदींनी सहभाग घेतला.