वाबळेवाडी आदर्श शाळा खाजगी कंपनीस देऊ नका…

वाबळेवाडी आदर्श शाळा खाजगी कंपनीस देऊ नका…

पुणे, दि. ७ ऑक्टोबर :

आदर्श शाळा वाबळेवाडी ही इतर कोणाही खाजगी कंपनीस दत्तक देवू नये. ती शाळा वाबळेवाडी ग्रामस्थांना दत्तक द्यावी. तसेच वाबळेवाडी शाळेवरील पूर्णपणे अनावश्यक चौकशी व चुकीची कारवाई करणाऱ्या जिल्हा परिषद अधिकाऱ्यांवर निलंबनाची कारवाई करण्यात यावी असे निवेदन वाबळेवाडी ग्रामस्थांच्या वतीने विधानपरिषद उपसभापती डॉ. नीलम गोऱ्हे यांना देण्यात आले.

याप्रसंगी सतीश वाबळे, सतीश कोठावळे, प्रकाश वाबळे, अंकुश वाबळे,केशवराव वाबळे, संदीप वाबळे,श्रीमती सुरेखा वाबळे, योगिता वाबळे,भारती वाबळे, सविता वाबळे यांनी डॉ. गोऱ्हे यांना लेखी निवेदन देत आपले म्हणणे मांडले.

वाबळेवाडी प्राथमिक शाळेचा आंतरराष्ट्रीय शाळा प्रकल्प सहभाग होऊन अटल बिहारी वाजपेयी आंतरराष्ट्रीय शाळा असे नामकरण झाल्याने तसेच वाबळेवाडी च्या शाळेमधील विविध प्रयोगाच्या यशामुळे खाजगी इंग्लिश शाळा बंद पडायला लागल्या. त्यामुळे खाजगी शाळांनी केलेल्या तक्रारीतून दत्तात्रय वारे गुरुजींना निलंबित करण्यात होते. यामध्ये त्यांची दोन वर्षे चौकशी करून विभागीय आयुक्त कार्यालयाने निर्दोष मुक्तता केली आहे. वारे गुरुजी यांच्यावर निलंबनाच्या कारवाईमुळे वाबळेवाडी शाळा पूर्णतः उद्ध्वस्त झाली असून आत्तापर्यंत २१२ मुलांनी शाळा सोडली आहे. शाळेमध्ये चालू असणारे सर्व नावीन्यपूर्ण उपक्रम बंद पडल्याने येथील विद्यार्थ्यांचे नुकसान झाले असल्याचे निवेदनात म्हटले आहे.

यावेळी ग्रामस्थांनी डॉ. गोऱ्हे यांच्याकडे सदर प्रकरणात सकारत्मक निर्णय होण्याची विनंती केली. याप्रसंगी उपसभापती डॉ. नीलम गोऱ्हे यांनी ग्रामस्थांचे म्हणणे समजून घेत, शासन स्तरावर पाठपुरावा सुरू असल्याचे सांगितले. तसेच सदर प्रकरणाबाबत शालेय शिक्षण मंत्री दीपक केसरकर यांच्याशी सकारत्मक बोलणे झाली असल्याचे सांगितले. यामध्ये मुलांचे नुकसान होणार नाही व वारे गुरुजींचे प्रयोग सुरू राहतील याबाबत नक्कीच सकारात्मक निर्णय होईल असे डॉ नीलम गोऱ्हे यांनी सांगितले.